The SUN HK : Pilipina ipinaaresto dahil hindi sinipot ang patong-patong na kaso

10 October 2023

Dinidinig ang kaso sa Sha Tin Magistracy

Isang Pilipina ang ipinaaresto matapos hindi sumipot kanina sa Shatin Court sa pagdinig ng walong kaso laban sa kanya.

Inutos rin ni Acting Principal Magistrate Amy Chan na kumpiskahin ang piyansang inilagak sa pulis ni Leila W. Fonte, 55 taong gulang, at huwag payagang makapagpiyansang muli.

Ang kasama niyang kinasuhan sa dalawa sa walong kaso, si Ricardo de Austria, 53 taong gulang na kapwa Pilipino, ay nakapagpiyansa ng $1,000 at nakalaya hanggang sa susunod na pagdinig sa Nov. 22.

PINDUTIN PARA SA DETALYE

Ang dalawa ay inakusahang nagsabwatan sa pagpapagamit ng Hong Kong ID ni de Austria sa isa pang tao, si Mohammed Shah, noong July 2020, na labag sa Crimes Ordinance at sa Registration of Persons Ordinance.

Sila rin ay inakusahan ng money laundering dahil ang account ni de Austria sa Hang Seng bank at CMB Wing Lung Bank ay nagamit sa pagpasok at paglabas ng kabuuang $414,781 na galing sa krimen mula Aug. 6, 2020 hanggang Sept. 7, 2022, na labag sa Organized and Serious Crimes Ordinance..

Maliban sa dalawang kasong ito, si Fonte ay sinampahan ng anim na karagdagang kaso.

PINDUTIN PARA SA DETALYE

Noong 2016, nilabag umano niya ang Registration of Persons Ordinance nang ipinagamit ang sarili niyang HKID sa kapwa Pilipinang si Merlyn Ibon.

Naulit ang pagpapagamit niya sa kanyang HKID kay Ibon noong September 2021.

Sa ikatlong pagkakataon, Ipinagamit muli ni Fonte ang kanyang HKID kay Ibon noong January 2022.

Pindutin dito

Sa pagitan ng July 2018 hanggang September 2021, nakipagsabwatan si Fonte kay Ibon sa pagpasok at paglabas sa isang HSBC account ng kabuuang $596,611.4 na galing sa krimen, na labag sa Common Law at Crimes Ordinance.

Dahil sa pagpapagamit ng HKID ni Fonte kay Ibon sa pagitan ng July at August 2018, nakakuha si Ibon ng utang na $10,003 mula sa United Asia Finance, na labag sa Common Law at Crimes Ordinance.

Ang ikawalong kaso laban kay Fonte ay ang paglabag sa Immigration Ordinance nang magsinungaling siya sa Immigration officer dahil sinabi niya noong Feb. 11, 2020 habang siya ay kumukuha ng dependant visa, na siya ay nagtatrabaho sa isang restaurant kahit hindi.