 |
| Ililipat sa District Court ang kaso sa Nov 27 |
Isasampa sa District Court ang kaso ng isang Pilipinong
akusado sa tangkang panloloob (attempted burglary) sa isang flat sa Hung Hom
noong Aug. 9.
Ang kaso laban kay Arnulfo dela Rosa, 46 taong gulang, ay mas seryoso sa simpleng pagnanakaw (o theft) kahit di naisakatuparan kaya ililipat sa mas mataas na korte, mula sa Kowloon City Magistrates' Court.
Ayon sa batas ang parusa sa panloloob ay maaring umabot sa hanggang 14 na taong pagkakakulong, ngunit karaniwan nang ginagamit ang tatlong taon bilang paunang sentensya, na maaring mabawasan pa depende sa laki ng halagang natangay kung meron, o kung umamin ang akusado.
Hindi tumutol ang abogado ni dela Rosa sa pagtakda ni Acting
Principal Magistrate Veronica Heung ng susunod na pagdinig sa Kowloon City
Court sa Nov. 27, upang pormal na ilipat ang mga dokumento ng kaso.
Dahil hindi humiling ng pyansa ang akusado ay ibinalik siya sa kulungan.
Si dela Rosa, na walang trabaho at walang permanenteng
tirahan sa Hong Kong, ay inakusahang nagtangka na pumasok sa isang flat sa Mei
King Mansion sa Hung Hom.
Walang iniulat na nawala sa lugar, pero sinabi ng report ng
Kowloon City Police na may intensiyong magnakaw si dela Rosa.
