The SUN HK : 20 buwang kulong dahil nagbenta ng nakaw habang naka-piyansa

14 September 2023

Nangyari ang krimen habang naka-piyansa ang Pinoy dahil sa naunang kaso

Ikinulong nitong Miyerkules ng 20 buwan ang isang Pilipinong nahuling nagbenta ng nakaw na singsing habang naka-piyansa pa sa pulisya dahil sa isang naunang kaso.

Tahimik na tinanggap ni Elvin Zuniga, 59 taong gulang at dating manager ng restaurant at bar, ang parusang binasa ni Deputy District Judge Edward Wong sa District Court.

Inaasahan na kulong ang parusa dahil sa naunang pagdinig noong Aug. 31 ay umamin si Zuniga sa akusasyong ibinenta niya ang isang brilyanteng singsing na nakuha niya sa babaeng Intsik na kapwa niya akusado.

PINDUTIN PARA SA DETALYE!

Pero hiningi ng kanyang abogado na huwag nang dagdagan ang kanyang sentensya dahil ang piyansa ay para daw sa kasong iniimbestigahan pa ng pulisya at hindi pa nakararating sa korte.

Isinantabi ni Judge Wong ang hiling ng abogado ni Zuniga. Ika niya, dahil ang parusang iminungkahi ng taga-usig ay dalawang taong pagkakulong, at dahil naka piyansa pa ang akusado sa isang naunang kaso ay dinagdagan niya ang parusa ng anim na buwan kaya naging 30 buwan.

PINDUTIN PARA SA DETALYE

Ipinaliwanag niya na ang desisyong ito ay base sa tatlong kaparehas na kasong nadesisyunan na, kung saan ang naging tanong ay kung gaano ang dapat madagdag na parusa, at hindi kung dapat bang dagdagan ang bigat ng sumunod na krimen.

Dahil sa pag-amin ni Zuniga, binawasan ni Wong ng 1/3 ang sentensiya kaya 20 buwan ang natira. Ito lang ang nakita niyang dahilan upang bawasan ang sentensiya, ika niya.

Nagsimula ang kaso ni Zuniga nong March 21 nang ibenta niya sa isang tindahan ang nakaw na singsing. Kumita siya rito ng $1,000 bilang komisyon mula sa kasama niya sa kaso na si Cheung wai-yee.

BOOK YOUR FLIGHTS NOW! PRESS FOR DETAILS

Si Cheung naman ay nahaharap sa apat pang kaso.

Inakusahan siyang nagpanggap na buyer ng singsing sa isang online na merkado, at nagbayad ng tseke sa may-ari sa halagang $37,500.

Ang singsing ang tinukoy na ibinenta ni Zuniga. Nalaman ng may-ari na naloko siya nang abisuhan siya ng kanyang bangko kinabukasan na tumalbog ang tseke ni Cheung.

Ganito rin ang modus ni Cheung sa panloloko sa tatlo pang tao upang makuha ang isang handbag, isang relo na nagkakahalaga ng $118,000, at tatlong mobile phone na ang kabuuang halaga ay $29,500.

Naningil pa siya sa ikatlong biktima ng dagdag na $9,500 dahil sumobra daw ng ganitong halaga ang kanyang naibayad.

PINDUTIN PARA SA DETALYE

Matapos basahin ni Wong ang parusa at lumabas ng korte, pinaligiran si Zuniga ng kanyang mga abogado upang ipaliwanang na dahil mahigit isang taon na siyang nakapiit at ibabawas pa ang mga piyesta opisyal, kaunti na lang ang kanyang pagsisilbihang sentensya.