The SUN HK : 8 linggong kulong dahil sa pananakit sa alagang paslit

29 July 2023

Walong linggong pagkabilanggo ang naging parusa ng isang Pilipinang domestic helper dahil sa pananakit sa kanyang alagang batang babae na isang taong gulang.

Nasentensiyahan si Florena Dulla, 53 taong gulang, sa katapusan ng paglilitis sa Eastern Courts noong Biyernes (July 28).

Inamin ni Dulla na pinalo niya ang kamay ng bata nang tatlong beses matapos itong mahulog sa sofa, at pagkatapos ay inihagis niya pabalik sa upuan.

PINDUTIN PARA SA DETALYE!

Pindutin para sa detalye

Ang pananakit ay nangyari sa bahay ng amo ni Dulla sa Ap Lei Chau bandang 8pm noong June 20.

Nalaman ng mga amo ang nangyari nang ikuwento ito sa kanila ni Dulla mismo, at humingi ito ng tawad, kaya nirepaso nila ang CCTV video at nakita ang pananakit.

Dahil limang linggo nang nakakulong si Dulla, tatlong linggo na lang ang ilalagi niya sa loob. Mababawasan pa ito kung iaawas ang mga piyesta opisya at discount sa pagiging mabait habang nakakulong.

PINDUTIN PARA SA DETALYE

Inaasahan ang pagpapakulong ni Dulla, dahil sa nakaraang pagdinig noong July 14, sinabihan ito ni Magistrate Philip Chan na hindi niya maiiwasan ang pagkabilanggo matapos niyang aminin na sinaktan niya ang kanyang alaga.

Ipinagpaliban ni Magistrate Chan ang pagpataw ng parusa kay Dulla noong Biyernes para sa background check at panonood ng CCTV video na nagpapakita ng insidente, upang gawing basehan ng sentensiya.

Sa kanyang paghiling kay Chan na magpataw ng magaang na parusa, sinabi ng abogado ni Dulla na sa 15 taon na pag-aalaga nito ng bata sa Hong Kong ay ngayon lang ito nakapanakit, at nagawa lang niya iyon para disiplinahin ang bata at nang hindi na ito ulit mahulog sa sofa.