 |
| Harap ng gusali kung saan nangyari ang panloloob. |
Dalawang Pilipina ang humarap sa Eastern Courts kanina sa
kasong pagnanakaw, pero isa sa kanila ang nakalaya sa bisa ng piyansa at ang
ikalawa ay nanatiling nakapiit dahil tumutol ang taga-usig na siya ay
pakawalan.
Itinuloy ni Principal Magistrate Ivy Chui ang bisa ng piyansang
$2,000 ni Ofelia Isabel Flores Jeans, 35 taong gulang na residente, matapos humingi ang taga-usig
ng dagdag na panahon upang mag-imbestiga ang mga pulis. Itinakda niya ang
susunod na pagdinig sa Aug. 9.
Pero nang mag-alok ang abogado ni Mishell Cornelio, 36 taong
gulang na domestic helper, ng $2,000 bilang piyansa at iba pang kondisyon -- gaya
ng hindi pag-alis sa Hong Kong at regular na pag-report sa pulis -- tumutol ang
taga-usig na pakawalan siya.
Ang dahilan: Isa sa tatlong kasong isinampa laban kay
Cornelio ay robbery, o panloloob, na mas mabigat na krimen kesa sa simpleng
pagnanakaw, ayon sa batas ng Hong Kong.
Malakas ang ebidensiya at nasisante na ng amo si Cornelio kaya
wala siyang matutuluyan, dagdag ng taga-usig.
Sumang-ayon si Magistrate Chui at inutos na ibalik sa
kulungan si Cornelio, pero itinakda niya sa July 18 ang susunod na pagdinig
upang tingnan kung pwede na itong mag-piyansa.
Ang unang kaso ni Cornelio ay ang pagpasok nang walang
paalam sa bahay ng anak ng amo niya sa Sai Ying Pun noong July 9, at pagtangay
ng 2,300 Taiwan dollar, 490,000 Vietnamese dong, 381,000 South Korean won, 104
Singapore dollar, 1,400 Thai baht, 9,000 Hong Kong dollar, tatlong gintong
kwintas, dalawang CCTV camera, at isang kurtina sa pinto.
Kinasuhan din siya ng pagnanakaw nang dalawang beses sa
nasabing bahay – ng isang gintong kwintas noong June 8, at ng isang gintong
pulseras noong July 6.
.png) |
| Ang residenteng si Jeans (kaliwa) matapos ang pagdinig. |
Samantala, si Jeans ay akusado sa pagnanakaw ng cash na $83,976.60
mula sa Le Colonial, isang Vietnamese restaurant, sa Paterson St, Causeway Bay.
Nangyari umano ang pagnanakaw sa pagitan ng March 15, 2021 at Sept. 13, 2022.
.png)
