The SUN HK : Pinay, nakasingil ng dapat matapos sapilitang dinala sa airport

Hinatid si Brenda hanggang sa check-in counter ng driver ng amo (File)

Sa kabila ng biglang pagpapababa sa kanya ng amo noong Lunes at pagdala sa kanya sa Hong Kong Airport ay nagawa pa rin ng Pilipinang si Brenda na makahingi ng tulong kaya hindi siya napilit na sumakay pauwi sa Pilipinas na $200 lang ang perang dala.

Sa tulong ng Social Justice for Migrant Workers, Overseas Workers Welfare Administration at ng kanyang employment agency ay nakatanggap si Brenda ng $7,399 bilang bayad sa sweldo at isang buwang pasabi. Nakunan din sya ng bagong air ticket kaya panatag na siyang umuwi kahapon.

Ayon kay Brenda, naka 17 araw pa lang siya sa employer na taga Chung Hom Kok nang bigla siyang papirmahin ng sulat na pinuputol na niya ang kanyang kontrata, at agad-agad na dinala sa airport ng kanilang driver.

PINDUTIN PARA SA DETALYE!

Bago ito ay ilang beses na daw siyang nagreklamo sa kanyang agency dahil dalawang malalaking bahay ang nililinis niya at dalawa niyang kasamahan na Indonesian. Bale may apat na palapag daw ang mga bahay, at may mga tatlong gusali ang pagitan kaya araw-araw ay panhik-baba sila, bukod pa sa lakad.

Nag-abot lang sila ng kanyang mga amo ng tatlong araw bago umalis ito papuntang ibang bansa kaya nitong huli ay wala nang nakatira sa mga bahay kundi sila ng mga kasamahang Indonesian, at limang aso.

Sa kabila nito ay walang tigil daw ang kanilang paglilinis, at hindi puwedeng magpahinga bukod sa oras ng pagkain, hanggang matulog sila ng 8:30 ng gabi.

EXTENDED TO JUNE 30!!

“Binigyan man lang kami sana ng kahit 30 minutong pahinga,” sabi ni Brenda. Pero hindi daw ito nangyari dahil laging nakabantay ang sekretarya ng kanilang amo, at agad silang hinahanap kapag hindi sila nakita sa camera.

Kapag sinabi nya daw sa sekretarya ang “I am so tired,” ay sasagutin lang siya ng “I know, I know,”pero tuloy pa rin ang pagbabantay sa kanila.

May mahigit na 200 na CCTV daw sa mga bahay, kaya nakikita ng sekretarya ang kanilang bawat galaw. Dahil dito ay napansin ng sekretarya na madalas na kumuha ng litrato sa buong kabahayan si Brenda kaya sinita siya.

BOOK YOUR FLIGHTS NOW! PRESS FOR DETAILS

Sa utos ng amo ay pinabura ng sekretarya ang mga kuha ni Brenda, at sinabing labag ito sa privacy ng kanyang mga pinagsisilbihan. Ang hindi niya alam ay pinadala na ni Brenda sa kanyang pamilya sa Pilipinas ang mga kuha para may magamit na patunay sakaling magkaroon siya ng problema sa trabaho.

Ang hindi niya inakala ay agad siyang papababain matapos palabasin na siya ang pumutol sa kanyang kontrata, at agad dalhin sa airport ng hindi binabayaran kundi ng $200 na pamasahe daw para sa kanyang pag-uwi.

Kahit nakabantay ang driver para masigurong nag check-in sya sa kanyang flight papuntang Maynila ay nakatawag pa rin si Brenda kay Marites Palma, founder ng Social Justice, na agad namang ipinarating ang kayang kalagayan sa OWWA.

BASAHIN DITO

Sa loob lang ng ilang minuto ay natawagan ng OWWA ang kanyang ahensya, na dali-dali namang sinabihan ang employer na kailangan niyang bayaran si Brenda ng sweldo para sa 17 na araw at isang buwang pasabi dahil sila naman talaga ang may gustong umalis na siya.

Pinagsabihan din ang amo na hindi nila dapat dinadala sa airport ang isang domestic worker kahit ito pa ang nag terminate dahil binibigyan ito ng batas ng 14 na araw para maghanda para sa pag-uwi, maghabol sa mga dapat ibayad, o magsampa ng kaso o reklamo kung kinakailangan.

Pinayuhan din ng OWWA si Brenda na magpunta sa Department of Migrant Workers pag-uwi kung gusto niyang maisama sa watchlist ang kanyang amo dahil sa ginawa sa kanya.

Pagkatapos makuha ang pagsang-ayon ng amo ay ang ahensya na mismo ang nag desisyong tumakbo sa airport para abonohan ang napagkasunduang bayad na $7,339. Kinuha din si Brenda ng bagong ticket bagamat kinabukasan na siya makakaalis.

Kahit medyo naiiyak pa rin ay nagawa pa rin ni Brenda na magpasalamat sa mga tumulong sa kanya, lalo na ang kanyang ahente na nangako pa daw na bibigyan siya ng bagong amo sa pagbisita nito sa Pilipinas sa darating na buwan.

Gusto pa rin naman daw niyang bumalik sa Hong Kong, kaya lang ay “sana ay hindi na ganoon kalaki ang bahay, kahit mag-alaga pa ako ng bata at magsilbi sa mag-asawang amo,” sabi ni Brenda.

Hindi naman daw siya bago sa pangangamuhan kahit ito ang unang kontrata niya sa Hong Kong. Nakapagtrabaho na din siya sa Taiwan at sa Singapore, kung saan maganda ang trato as kanya ng mga amo na parehong doktor.

Sayang nga lang daw at nagdesisyon ang mga ito na manirahan na sa Amerika kaya naisipan niyang sa Hong Kong naman makipagsapalaran.