The SUN HK : Pilipinang sangkot sa kasong droga, nililitis sa High Court

13 June 2023

Ang nasamsam na droga (larawan mula sa HK Customs

Nagsimula kanina ang paglilitis sa High Court ng isang Pilipinang nasangkot sa isang kasong droga dahil siya ang tumanggap ng isang karton na may lamang dalawang kilong shabu at ketamine, na dumating mula sa Malaysia.

Kinasuhan si Alma Montano, 38 taong gulang na domestic helper, ng pagtatangka na mangalakal ng mapanganib na gamot matapos siyang hulihin ng mga operatiba ng Customs and Excise noong Dec. 11, 2019.

Kasama niyang kinasuhan si Nwokeji Ifeanyi Canis, isang 50 taong gulang na Nigerian, na kinasuhan ng pangangalakal ng droga.

PINDUTIN PARA SA DETALYE!

Ayon sa testimonya ng unang dalawang kawani ng Customs, nasabat ang isang kahon na may markang nagsasabi na naglalaman ito ng mga parte ng vacuum cleaner, dahil may nakitang kahinahinalang laman nang idaan ito sa x-ray.

Binuksan ng isang kawani ang karton at, maliban sa mga parte ng vacuum cleaner, mayroon ding nakapaloob na pakete ng pulbos na tsokolate. Nang buksan nya ang mga pakete, tumambad sa kanya ang drogang nakabalot sa palara. Nakumpirma sa Ion Analysis Test na ang nakita niya ay methamphetamine hydrochloride (o shabu) at ketamine.

Ayon sa unang press statement ng Customs noong Dec. 12, 2019, nagkakahalaga ang mga droga ng $2.5 million. Pero ayon sa napagkasunduang salaysay sa korte, ang halaga ng nasamsam na mahigit tatlong kilong droga ay $1.8 million.

EXTENDED TO JUNE 30!!

Dumating ang karton sa Customs Control Point sa Lok Ma Chau na dala ng isang sasakyan ng UPS mula sa Shenzhen, kung saan ibinaba ito ng eroplanong galing sa Kuala Lumpur. Nakapangalan ito kay Montano, at nakalista ang kanyang tirahan at numero ng telepono.

Nang tawagan ng testigo ang numero, sinagot ito ni Montano, na pumayag din na tanggapin ang kahon sa kanyang tirahan.

Ayon sa testigo, dumating si Montano sa harap ng isang gusali sa Sham Shui Po para tanggapin ang kahon mula sa taga Customs na nakasuot ng uniporme sa UPS. May dala siyang straw bag upang paglagyan nito.

BOOK YOUR FLIGHTS NOW! PRESS FOR DETAILS

Doon na inaresto si Montano, na nagulat sa pangyayari. Binalaan siya ng ahente na ang mga sasabihin niya simula noon ay puwedeng gamitin sa korte laban sa kanya. Noon din siya kinausap na makipag-tulungan upang mahuli ang totoong may-ari ng droga.

Mula doon ay dinala niya ang straw bag sa isang lalaking naghihintay sa kasunod na kanto. Inilapag niya ang bag at nang bitbitin ito ng lalaki naglabasan ang mga operatiba ng Customs. Inaresto nila si Nwokeji.

Dinala Si Montano at Nwokeji sa istasyon ng pulis, sakay ng magkahiwalay na sasakyan, upang imbestigahan.