Isang Pilipina ang napawalang-sala sa West Kowloon Court kahapon, May 31, matapos
litisin sa kasong pagnanakaw ng mga alahas sa kanyang among taga-Tsuen Wan.
Nabunutan ng tinik si Rovil Deaso, 42 taong gulang, nang
basahin ni Magistrate Andrew Mok ang kanyang desisyon sa kaso kung saan inakusahan
siyang nagnakaw ng dalawang gintong palawit sa kuwintas na nakasilid sa isang supot
na pang-alahas.
Nagkakahalaga umano ang mga alahas ng $4,000.
Hindi pinaniwalaan ni Magistrate Mok ang akusasyon ng amo ni
Deaso na si Siu Yee Kwan, na taga Parc City, Tsuen Wan, na ninakaw niya ang
alahas noong Oct. 30, 2022 sa kanyang bahay.
Hindi sapat ang testimonya at ebidensyang inihain ng
taga-usig upang patunayan na lumabag si Deaso sa Theft Ordinance, na nagtatakda
ng parusang aabot sa hanggang sampung taon.
