The SUN HK : Kalayaan Ball, bakit biglang naging business seminar?

Ni Marites Palma

Ang aktor at pulitiko na si Cesar Montano habang ipinapakilala ang Elite Group
(kapansin-pansin na wala ang pangalang Kalayaan Ball sa entablado)

Nakatakdang pulungin ng Konsulado ang mga pasimuno sa “Kalayaan Ball” noong nakaraang Linggo, June 25, sa Tao Heung Restaurant sa Causeway Bay, matapos maglabasan sa social media ang reklamo ng mga dumalo dahil sa lantarang pagnenegosyo ng isang sponsor sa pagtitipon.

Napalitan ng panghihinayang at sama ng loob ang dapat sanang masayang kuwentuhan, kainan, kantahan at sayawan dahil tatlong taon ding walang naganap na Kalayaan Ball dahil Sa Covid-19.

Ayon kay Consul General Raly Tejada, "The Consulate will meet the organizers next weekend to find out what happened. We understand that many felt disappointed as expectations were not met. This is indeed unfortunate."

PINDUTIN PARA SA DETALYE!

Bukod sa hindi inaasahang “business seminar” ng Elite Club Pinoy Hong Kong na tumagal ng mahigit dalawang oras, marami ang nagreklamo sa kakulangan diumano ng pagkain at inumin sa naturang pagtitipon, gayong pinagbayad naman sila ng tig $220 para sa tanghalian.

"Kalayaan Ball or Elite Seminar? Nabudol ako, kami, tayo!!!” Ito ang isa sa mga mabilis na kumalat na post sa Facebook mula kay Fayeh Guevarra ng Philippine Alliance.

Ayon kay Guevarra na isa sa mga naatasang mangolekta ng bayad mula sa mga dumalo, napahiya daw siya sa nangyari dahil marami ang gumastos pa para sa makeup at espesyal na damit na sinuot sa okasyon, pero natali lang sa kani-kanilang mga upuan para makinig sa seminar.

EXTENDED TO JUNE 30!!

Marami din daw ang ginutom, kaya nagpuntahan sila sa kalapit na McDonald’s pagkatapos ng salo-salo.

Ganoon na lang din ang sama niya nang loob nang sabihin ng bisitang comedienne na si Boobsie na bayad ng Elite ang kanilang kinain.

“Booooo, mahal ang binayaran namin. Kau mga Elite people ang nagpasasa sa libre. Ginawa nyong gatasan ang mga OFW sa HK,” sabi ni Guevarra sa kanyang post.

Kitang-kita ang pagsisiksikan ng mga dumalo sa kuhang ito ni Marie Rivera

Ayon naman kay Toni Ramos ng Angat Pinknoy, “Lahat nabudol, ang mga costume namin pinaghirapan namin bilhin, tapos ang dadatnan mo seminar. Ni walang drinks na mainom, bagkus mainit na tubig. So disappointed talaga.”

Dagdag niya, kung business presentation o seminar ang isasagawa, dapat libre na ang dadalo dahil mahihirapan silang manghatak ng mga tao. Nakakasama daw ng loob na ginawa ito sa mismong Kalayaan Ball para masiguro na maraming tao.

Mapapansin din sa mga litrato na sa halip na "Kalayaan Ball" ang nasa backdrop ng entablado ay pangalan ng Elite Club ang makikita.

Halata ang pagkabahala ni Selomenio (kaliwa) sa kuhang ito ni Jenny Gafate

Ayon naman kay Leo Selomenio, chairman ng Global Alliance na siyang tumayong organizer ng kasiyahan, ang sponsor na Elite Group ang hindi sumunod sa usapan na isa’t kalahating oras lang sila magpo promote ng kanilang negosyo kaya nagulo ang programa.

Inamin ni Selomenio na nagpadala ng Php100,000 (mga HK$15,000) ang Elite sa kanyang bank account na ayon sa kasunduan ng kaniyang grupo ay gagamitin para sa $50 na “subsidy” sa bawat OFW na dadalo.

Dahil $250 ang pinakamurang singil ng mga napagtanungan nilang mga restaurant ay minabuti nilang maningil nang tig $220 para may ekstrang perang pambayad para sa mga espesyal nilang panauhin.

BOOK YOUR FLIGHTS NOW! PRESS FOR DETAILS

Ang usapan daw nila ng Elite ay ipakilala lang nila ang kanilang grupo at magdadala ng mga entertainers (bukod kay Boobsie ay dumalo sina Cesar Montano at Jay Manalo) kaya binigyan sila ng oras na 11am-12:30pm.

“Pero ang nangyari from 12 to 2 pm nag promote sila at hindi na pumasok mga performers. Ang mga artista hindi naman nag perform kundi nag promote na rin,” himutok niya.

Sinubukan daw niyang patigilin ang grupo, at hindi lang 10 beses siyang nagpabalik-balik sa kanila para makiusap pero hindi sila sumunod. Nang tanggalan daw sila ng mic bandang 2pm ay nagalit pa ang mga ito kaya hindi na niya nasingil ang kulang sa “subsidy” na pinangako nila.

BASAHIN DITO

Ang inamin niyang mali ng kanyang grupo ay tumanggap sila ng maraming dumalo kaya nagsiksikan sila sa loob.

Dahil umabot sa mahigit 600 ang dumalo, imbes sa 300 na inaasahan, ay umabot sa 56 mesa na may tig-12 katao ang napuno nang araw na iyon. Ang singil sa bawat mesa ay $3,000, kaya umabot sa mahigit $198,000 ang binayaran nila, na lampas sa kabuuang halagang nakolekta nila.

Resibo para sa binayaran sa restaurant, mula kay Selomenio

Ang kinalabasan, kinailangan pa daw niyang mangutang sa kanyang leaders para may pampuno sa ibinayad sa kainan. Nagpakita siya ng resibo para patunayan kung magkano ang binayad nila sa kabuuan.

“On our part, we wholeheartedly apologize for our shortcomings pero we didn’t intend na mangloko ng kapwa, na base sa mga post,” sabi ni Selomenio.

Dagdag pa niya, hindi naman nakuhanan ng pera ang mga dumalo para masabi nilang na-scam sila.

Hindi na rin daw nila kasalanan kung naunsyami ang pagrarampa ng ilan sa mga dumalo nang naka ball gown dahil “semi-formal” lang ang nakalagay na dress code.

Gayunpaman, nakaugalian na ng mga OFW na dumadalo sa “Kalayaan Ball” na magpabongga nang husto dahil ito lang sa buong isang taon na nagkakaroon sila ng pagkakataon na ipakita ang kanilang pinaka magarang Filipiniana na kasuotan.

Ang “Kalayaan Ball” ay inumpisahan ng grupong Philippine Alliance ilang taon na ang nakakaraan para magkaroon ng pagkakataon ang mga OFW na magsalo-salo at pumorma sa isang araw ng Linggo para ipagdiwang ang Araw ng Kalayaan ng Pilipinas.

Ginaganap ito pagkatapos ng Independence Day Ball na ilang dekada nang isinasagawa ng Philippine Association of Hong Kong, na binubuo ng mga Pilipinong residente dito; at ang kasunod na maghapong pagdiriwang sa Chater Road sa Central.