 |
| Makakahingi ng tulong sa pagrerehistro ng SIM card sa 25 MTR station, katulad ng sa North Point |
Simula bukas, Jan. 8 ay
pag-iibayuhin ang pagtulong sa mga kailangang magrehistro ng kanilang SIM card
sa 25 istasyon ng MTR sa Hong Kong.
Kailangang mairehistro
lahat ng mga SIM card na kasalukuyang ginagamit hanggang Feb. 23, kundi ay
hindi na maaring gamitin ang numerong nakatalaga sa mga ito.
Ayon sa isang pahayag na
ipinalabas ng gobyerno ngayong araw ng Sabado, ang mga “support stations” sa
mga MTR station na nagbibigay ng tulong sa pagrerehistro ay bukas mula 9am
hanggang 6pm araw-araw.
Bukod sa pagsagot sa mga
katanungan, maari din silang tumulong na irehistro ang isang SIM card gamit ang
mismong telepono ng may-ari ng numero.
Libre ang mga serbisyong
ito. Kailangan lang dalhin ng nagpapatulong ang kanilang HKID card, ang SIM
card na pinaparehistro at isang mobile phone na maaring padalhan ng mensahe
para makumpleto ang pagrerehistro.
Ang mga edad 16 pababa
ay kailangang may kasama na edad 18 pataas para matulungan sa pagrerehistro.
Ang mga personal na detalye ng kasamang nakatatanda ay irerehistro din bilang
seguridad.
Ang listahan ng mga MTR
station kung saan maaring magpatulong ay narito: https://gia.info.gov.hk/general/202301/07/P2023010600584_410154_1_1673053360048.pdf
Bukod
sa mga MTR station ay maari ding magpatulong sa alin mang tindahan ng service provider
o ng mga kumpanya kung saan nakakabit ang linya ng telepono, o sa mga “service
counter” sa 18 sangay ng post office.
 |
| Maari ding magpatulong sa 18 post offices, kabilang ang General Post Office sa Central |
Narito
ang listahan ng mga post office kung saan may “service counter” para dito: https://gia.info.gov.hk/general/202301/07/P2023010600584_410155_1_1673053360055.pdf
Muling
nagpaalala ang gobyerno na kailangang marehistro ang mga SIM card bago sa
takdang panahon para patuloy na magamit ang numero ng telepono na nakatalaga bawat
isa sa mga ito.
Tinatawagan
din ang mga kapamilya at kaibigan ng mga dapat magparehistro na paalalahanan
silaa tungkol dito, at kung kinakailangan, ay tulungan sila na maisagawa ito.
Dapat
daw gawin ito sa lalong madaling panahon para maiwasan ang pagmamadali sa mga
huling araw na itinakda para sa pagrerehistro.
Para sa
karagdagang impormasyon, bumisita lang sa website na ito: www.ofca.gov.hk/simreg o
tumawag sa hotline ng Office of the Communications Authority, 2961 6699.
.jpg)
