The SUN HK : Alok na piyansa ng 2 Pilipino tinanggihan

07 December 2022

Nabigong kumbinsihin ng dalawang Pilipino na payagan silang magpiyansa sa Shatin Magistracy

Dalawang Pilipino na kinasuhan ng paglabag sa Immigration Ordinance ang tinanggihan nang mag-alok ng piyansa sa magkahiwalay na kaso ngayon sa Shatin Magistracy, kaya ibinalik sila sa kulungan.

Sinabi ni acting Principal Magistrate David Cheung sa dalawa na mabigat ang kinasangkutan nilang krimen, malakas ang ebidensya laban sa kanila, at walang kasiguruhan na babalik sila sa korte sa takdang araw, dahil wala silang tirahan sa labas.

PINDUTIN PARA SA DETALYE

Nabigong kumbinsihin ni June Ernie Togle, 45 taong gulang, ang korte na palayain siya nang pansamantala kahit itinaas niya sa $10,000 ang kanyang alok na piyansa mula $5,000, at dinagdagan pa ng $10,000 na garantiya ng isa niyang kaibigan.

Nahuli si Togle noong Oct. 25 na nagtatrabaho nang ilegal sa isang restaurant sa Lamma Island.

PINDUTIN PARA SA DETALYE

Bilang aplikante sa non-refoulement, o pagbabawal na pwersahang pagpapauwi sa kanya, siya ay pinakalooban ng recognizance paper upang manatili sa Hong Kong, pero bawal sa kanya ang magtrabaho o sumali sa negosyo.

Nahuli rin na kasama niya sa trabaho si Florian Funa, na may visa bilang domestic helper.

Ayon sa Immigration Ordinance, bawal magtrabaho si Funa sa labas ng bahay ng amo niyang nakalista sa Immigration Department. Hindi siya ikinulong matapos payagang magpiyansa ng $1,000.

Itinakda ni Magistrate Cheung ang paglilitis sa kaso nila sa March 13-14.

PINDUTIN PARA SA DETALYE

Ang ikalawang tinanggihan ay si Joy Yecyec, 41 taong gulang, na nag-alok naman ng $1,000 bilang piyansa sa isang bail review, upang makalabas ng kulungan habang hinihintay ang susunod niyang pagdinig sa Jan. 10 sa dalawang kasong isinampa laban sa kanya ng Immigration.

Press for details

Inakusahan siyang nagpanggap na domestic helper at nagsumite ng pekeng kontrata noong July 22 sa Immigration Department upang mabigyan ng visa.

Pagkalipas ng siyam na araw, gumamit siya ng pekeng impormasyon galing dito upang makakuha ng Hong Kong ID.

BASAHIN ANG DETALYE

Ang taong nakalagay sa kontrata bilang amo niya ay tumanggi na nagtrabaho siya sa kanila o pinirmahan ang kontrata niya. Siya at ang asawa nito ang testigo ng taga-usig laban kay Yecyec.