The SUN HK : ATIS-HK, 30 taon na!

Masaya ang naging pagdaraos ng ika-30 anibersaryo ng ATIS HK sa Victoria Park

Tagumpay na nairaos ng mga miyembro Abra-Tingguian Ilocano Society (o ATIS) Hong Kong ang selebrasyon ng kanilang ika-30 taong anibersaryo sa Victoria Park sa Causeway Bay nitong Linggo, Nov 20.

Buong-galak na sinalubong ng kanilang pangulong si Ludy Guinaban ang may 100 katao na nagtipon-tipon para samahan sila sa pagdiriwang ng isa sa pinakamahalagang okasyon para sa kanilang grupo.

Aniya, tatlong taon nilang hindi naisagawa ang nakagawian nilang malakihang pagtitipon para ipagdiwang ang kanilang anibersaryo ng dahil sa pandemya, kaya natutuwa siya na nagawa nila ito ngayon, sa kanilang ika-30 taong anibersaryo.

PINDUTIN PARA SA DETALYE

Isang hamon naman sa grupo ang naging mensahe ng kanilang tampok na panauhin na si Cynthia Tellez, general manager ng Mission for Migrant Workers.

Pagkatapos niyang batiin ang ATIS sa pagiging matatag nito sa loob ng nagdaang tatlong dekada ay sinabi niya na sana ay makahanap pa sila ng mas makahanap pa sila ng bagong paraan para mahikayat na sumapi sa kanila hindi lang mga taga Abra, kundi pati yung mula sa iba pang parte ng Pilipinas.

“Pero kaya pa ninyong pasidhiin, kaya pa ninyong payabungin (ang inyong grupo),” sabi ni Tellez, gaya daw ng tema ng kanilang pagdiriwang na “Advancing the rights and welfare of migrants and their families.”

PINDUTIN PARA SA DETALYE

Dagdag pa niya, kailangan ng kasapian na pakinggan pa nang mas mabuti ang mga pananaw ng mga miyembro, kahit yung taliwas sa sarili nilang adhikain; pero kasabay nito ay dapat din nilang ipaunawa na mahalaga na ang katotohanan lang ang kanilang dapat paniwalaan.

“Unity, truth and peace with justice” (pagkakaisa, katototahan, at katiwasayan na may hustisya) – ito daw ang dapat na maging sandigan ng grupo.

“Walang imposible sa ATIS,” sabi ni Tellez bilang pangwakas.

Nakisali si Tellez (may ribbon) sa pagsasayaw ng katutubong sayaw ng mga Abraeno

Ang isa pang tagapagsalita, si Eman Villanueva, pinuno ng Bayan Hong Kong at Macau at isa sa mga pangunahing lider ng mga migrante sa Hong Kong, ang nagbigay-pugay naman sa tatag ng ATIS.

Marami nang mga organisasyon ang nabuwag nang dahil sa usapin sa pera o intriga, sabi niya, pero nanatiling buo at matatag ang ATIS sa loob ng 30 taon.

Press for details

Sa tagal ng kanilang pagsasama ay napatunayan nila na ang kanilang grupo ay nabubuhay dahil sa malalim na prinsipyo ng pangangalaga at pagsasamahan, dagdag ni Villanueva.

Pinuri naman ni Daisy CL Mandap, editor ng The SUN, ang husay ng pamamahala ng mga lider ng ATIS mula sa founder nilang si Caring Bachiller, dating president na si Vicky Cabantac, hanggang sa kasalukuyang pamunuan, dahilan para patuloy na maging matatag ang grupo.

Bukod sa pagtutok sa mga pangangailangan ng kanilang mga miyembro at kababayan ay aktibo din sila sa pagpapalalaganap ng mga makatotohanang pananaw sa mga usapin na may kinalaman sa mga migrante at pati na ng lahat ng mga Pilipino.

BASAHIN ANG DETALYE

Hindi daw makakalimutan ng The SUN na sa pagpili nila ng pinakamahusay na grupo ng mga migrante may 20 taon na ang nakakaraan ay ang ATIS agad ang lumutang na panalo dahil sa dami ng kanilang mga makabuluhang proyekto hindi lang sa Abra kundi pati sa Hong Kong.

Ang pasinaya ay tinampukan din ng pag-aabot ng mga premyo ng mga nanalo sa patimpalak para sa Miss Atis 2022, na nauna nang napili sa pamamagitan ng balota.

Ang nagkamit ng titulo ay si Marielle S. Lingbaoan ng Licuan-Baay HK Association, pumangalawa si Faye Averille B. Tacanay ng Bangued Migrants Organization, pangatlo si Marisol C. Bites ng Timpuyog ti Tayun at pang-apat si Jellybin T. Balbalec ng Lagangilang Overseas Association.

Kasali din sina Shirley G. Biares na taga Manabo, Joanalyne Mae A. Dreu ng La Paz, at Liwanag T. Pacios ng San Juan.

Napili ng mga hurado si Biares para sa kategoryang Miss Congeniality at si Balbalec para sa Best in Ethnic Attire.

Natapos ang pagdiriwang sa masayang kainan at pagpapakuha ng litrato ng lahat ng mga dumalo.