The SUN HK : Pagbabayad sa PhilHealth, hindi raw sapilitan sa mga OFW

Ni Daisy CL Mandap

'Pinagkakakitaan!" Ito ang sagot ng mga OFW sa tanong na ito ni Alann Mas

Hindi kailan man ikinabit sa OEC (overseas employment certificate) ang pagbabayad para sa PhilHealth kaya hindi ito sapilitan sa mga overseas Filipino workers.

Ito ang sinabi ni Ringo Danao, senior social insurance officer ng PhilHealth o Philippine Health Insurance Corporation, sa isang pakikipag-usap sa mga lider ng migranteng Pilipino sa Hong Kong na ginanap nitong Linggo sa Wesleyan building sa Wan Chai.

PINDUTIN PARA SA DETALYE

Isinagawa ang pulong sa pagitan ng mga kinatawan ng mga opisyal at ahensya ng gobyerno at mga lider ng komunidad sa pakikipag-ugnayan ng Rise Against Government Exactions o Rage, na itinatag ng ilang grupo ng mga OFW matapos ipasa ang Universal Health Care (UHC) Law noong Pebrero ng 2019.

Bukod kay Danao, dumalo din sa online na pagtitipon ang manager ng OFW Operations Centre Department ng Pag-IBIG Fund na si Rosette Ignacio, Consul Paulo Saret ng Konsulado at Assistant Labor Attache Angelica Sunga.

PRESS FOR DETAILS!

Ayon kay Danao, hindi isinama ang pagbabayad para sa PhilHealth sa listahan ng mga singilan na ikinabit sa OEC noong Agosto ng taong 2015.

“Hindi requirement ang pagbabayad sa PhilHealth sa pagkuha ng OEC,” sabi ni Danao.

Humingi din siya ng pag-unawa sa mga OFW lider na mariing tinututulan ang puwersahang paniningil para sa PhilHealth. Ayon sa kanya, ipinapatupad lang nila ang mga panuntunan na nakasaad sa UHC law na pinirmahan ni dating Pangulong Rodrigo Duterte.

PRESS FOR DETAILS

Sa ilalim ng batas na ito ay umaabot na sa 4% ng buwanang suweldo ng isang OFW ang dapat nilang ibayad para sa PhilHealth. Ibig sabihin, ang dapat bayaran ng isang OFW sa Hong Kong na kumikita ng pinakamababang sahod na $4,630 ay mahigit Php15,500 sa isang taon, o Php31,000 sa bawat dalawang taon na kontrata.

Ayon sa kinatawan ng mga OFW, kung pagsasamahin ang lahat ng mga pwersahang singilin sa mga OFW kasama ang para sa PhilHealth ay aabot ito sa mahigit Php40,000 bawat taon.

“Kaunti na lang ay pwede nang bumili ng tricycle,” sabi ni Eman Villanueva ng Bayan Hong Kong and Macau na isa sa mga nagsalita. Pero kahit sa mga OFW-driver na higit na malaki ang sinasahod ay mahihirapan daw maglabas ng ganito kalaking halaga taon-taon.

PINDUTIN PARA SA DETALYE

Ayon kay Danao, ipinaabot na daw nila kay Department of Migrant Workers Secretary Susan Ople ang kanilang posisyon tungkol sa usaping ito, dahil una nang isinapubliko ng kalihim ang kanyang pagkabahala sa malaking halaga na sinisingil sa mga OFW para dito.

Naging palaisipan naman ito sa mga lider ng RAGE na pinangungunahan nina Dolores Balladares-Pelaez at Alann Mas, dahil naging malaking balita noong 2020 ang pagpatigil ni Duterte sa paniningil para sa PhilHealth nang umalma ang maraming OFW sa iba-ibang parte ng mundo.

Pinakita ni Mas ang sisingilin para sa PhilHealth sa isang OFW na kumikita ng minimum sa HK

Pero kung nakaluwag sa isipan nila ng bahagya ang sinabi ng taga PhilHealth ay kabaligtaran naman ang epekto ng pahayag ni Ignacio ng Pag-IBIG.

Kinumpirma ni Ignacio na simula ngayong Lunes, Aug 1, ay ipapatupad na ang pagkakabit sa ng Pag-IBIG sa OEC. Ibig sabihin, lahat ng kukuha ng OEC ay dapat nang ilagay ang kanilang Pag-IBIG membership number sa online form na kailangan nilang sagutin, bago sila makakuha ng exemption at makaalis ng bansa.

Press for details

Dagdag niya, para daw ito masiguro na ang bawat perang binabayad ng isang OFW para sa Pag-IBIG ay naipapasok sa kanilang account. Kahit magpalipat-lipat daw sila ng bansang pagtatrabahuan ay sa iisang account lang papasok ang kanilang bayad.

Nagbigay din si Ignacio ng datos na nagpapakita na mula sa Php100 kada buwan na binayad ng mga OFW ay libo-libo na ang nakinabang sa pamamagitan ng housing loan at iba pang benepisyo.

Nilinaw naman ni Balladares-Pelaez na hindi nila tinututulan ang pagbabayad para sa Pag-IBIG ng mga OFW dahil marami din naman ang naniniwala na malaki ang naitutulong nito para sila kumita o magkabahay.

Tunghayan ang isa na namang kwentong Dream Love

Ang ayaw lang daw nila ay ang gawin itong sapilitan dahil higit na nakakarami ang mga OFW na gipit sa pera o walang balak mangutang para sa pagpapatayo ng bahay.

Ang iba pang nakalinyang bayarin na mahigpit na tinututulan ng mga OFW sa pangunguna ng RAGE ay ang para sa expanded mandatory insurance na kasalukuyan nang ipinatutupad, at sa SSS o Social Security System na ayon kay Mas, ay di hamak na malaki ang idudulot na kawalan sa mga OFW.

Nanawagan sila na ibasura na lang ang OEC para hindi na daw ito gamitin ng iba-ibang ahensya na gustong makasingil nang sapilitan sa mga OFW.

“Bagong Bayani ba tayo o Gatasang Baka?” sabi ni Mas sa paninimula ng kanyang pagbabahagi sa pulong. Ang nagkakaisang tugon ng mga OFW sa pulong, ""Gatasang Baka."

SA SUSUNOD: Ang singilan para sa expanded mandatory insurance at sa SSS