The SUN HK : Mandatory SSS, pinakamabigat na dalahin ng mga OFW kung sakali

Ni Daisy CL Mandap

Ayon sa RA 11199, 13% ng buwanang kita ng isang OFW ang kailangang ibayad sa SSS para sa 2022

Hindi pala ang sapilitang pagbabayad sa PhilHealth (Philippine Health Insurance Corporation) ang maaring magbigay ng pinakamalaking alalahanin sa mga overseas Filipino workers kundi ang bayarin para sa SSS (Social Security System).

Ito ang lumabas sa pagpapaliwanag na ginawa ni Alann C. Mas ng Rise Against Government Exactions o Rage, sa isang pulong na ginawa noong Linggo, Jul 31.

Pero sa ngayon, ayon na rin sa mga reklamong pinarating ng ilang lider ng Filipino community na dumalo sa pulong, ang nagdudulot ng pinaka malaking problema sa mga OFW na umuuwi para magbakasyon ay ang “expanded coverage” ng mandatory insurance.

PINDUTIN PARA SA DETALYE

Ayon kay Mas, lingid sa kaalaman ng marami ay noon pa isinabatas ang sapilitang paniningil sa mga OFW para sa SSS, alinsunod sa Republic Act 11199 na pinirmahan ng dating Pangulong Rodrigo Duterte noong Feb 7, 2019. (https://lawphil.net/statutes/repacts/ra2019/ra_11199_2019.html_

Batay din sa batas na ito, ang dapat bayaran ng mga OFW na kumikita ng hindi bababa sa Php25,000 na “maximum salary credit ngayong taong 2022 ay 13% ng kanilang sahod buwan-buwan. Ibig sabihin, ang dapat nilang bayaran buwan-buwan ay Php3,250 o Php39,000 taon-taon.

Sa darating na 2023 at 2024 ay tataas ang maximum salary credit sa Php30,000 na dahil sa kasalukuyang taas ng palitan sa dolyar ay saklaw pa rin ang mga foreign domestic worker sa Hong Kong.

PINDUTIN PARA SA DETALYE

Itataas din sa 14% ang buong kontribusyon ng mga “self-employed” na manggagawa katulad ng mga OFW kaya ang pinakamababang dapat nilang bayaran kada buwan ay Php4,200 o Php50,400 taon-taon.

Mas lalo pang tataas ang babayaran sa 2025 dahil 15% na ng buwanang sweldo ang ikakaltas, at itataas sa Php35,000 ang maximum salary credit. Ang buwanang bayad sa ganitong kwentahan ay Php5,250 at Php63,000 bawat taon.

Ayon kay Mas, ang batas na ito na hindi man lang ikinunsulta sa mga OFW bago ipinatupad ay nagpapakita ng “unfair treatment of overseas workers.”

Paliwanag ni Mas, “Sabi sa batas kaming mga lang-based OFWs ay katulad ng mga self-employed members at kakarguhin namin ang buong kontribusyon kasi hindi naman pwedeng pagbayarin ang aming mga employers o sabihan sila na mag share sa bayad.”

PRESS FOR DETAILS!

Hindi daw dapat gawing sapilitan ang pagiging miyembro sa SSS ng mga OFW dahil dagdag-pahirap ito lalo na sa panahon ng pandemya.

“Bakit hindi igalang at bigyan ng kalayaan ang bawat isa sa amin na mamili sa pagpapa miyembro?,” tanong ni Mas.

“Ang Php3,250 na buwanang kontribusyon na ipinapataw sa isang minimum wage earner dito sa HK ay sobrang bigat. Imbes na ipapadala na lang sa pamilya at pandagdag sa nagtataasang mga bilihin ngayon ay mawawala pa.”

Si Mas habang tinatalakay naman ang bayarin sa PhilHealth

Sa unang bahagi ng pulong ay inanunsyo ni Dolores Balladares-Pelaez na kabilang din sa Rage na kasama sa mga magsasalita ang kinatawan ng SSS sa Hong Kong na si Lester Mata, ngunit hindi na siya natawag dahil nagahol sa oras.

Pero sa isang hiwalay na panayam, pinaliwanag ni Mata na hindi pa rin nila pinapatupad ang sapilitang pagbabayad para sa SSS ng mga OFW sa Hong Kong. Wala din daw alalahanin ang mga papauwi para magbakasyon dahil hindi nakakabit sa OEC ang pagbabayad dito, hindi katulad ng paniningil para sa Pag-IBIG Fund.

Press for details

Simula kahapon, Aug 1, lahat ng mag aapply para sa overseas employment certificate o OEC ay hinihingan na ng Pag-IBIG number, na katibayan na nagbabayad sila sa ahensya na itinatag para magbigay ng pautang para sa pabahay at investment.

Dagdag ni Mata, ang mga gustong magmiyembro sa SSS o magpatuloy ng kanilang pagbabayad bilang miyembro ay maaari pa ring magbayad ng minimum na buwanang kontribusyon na Php1,040 o ng maximum na Php3,250.

Ang isa pang bayarin na mariing pinoprotesta ng mga migrante ay ang para sa PhilHealth o Philippine Health Insurance Corporation na ayon sa RA 11223 o Universal Health Care Law ay kailangan ding kolektahin ng sapilitan sa mga OFW.

Tunghayan ang isa na namang kwentong Dream Love

Alinsunod sa batas na ito na pinirmahan din ni Pangulong Duterte noong February 2019, itataas ang porsyento na ikakaltas mula sa buwanang suweldo ng mga manggagawa taon-taon simula sa 2020.

Para sa kasalukuyang taon, 4% na ng buwanang suweldo ng mga manggagawa ang kakaltasin para sa pambansang health insurance. Sa mga FDW sa Hong Kong na minimum ang sahod, mangangahulugan ito ng Php1,300 na bawas sa kanilang buwanang suweldo, o Php15,500 kada taon.

Mabuti na lang at sinabi ng kinatawan ng PhilHealth sa isinagawang pagpupulong na hindi kailanman ikinabit sa OEC ang pagbabayad para dito, bagamat nananatili itong batas.

Ang pangatlong bayarin ay kasalukuyan nang sinisingil sa mga kumukuha ng OEC, at ito ay para sa expanded mandatory insurance. Ayon sa mga dumating sa Hong Kong kamakailan, siningil sila ng hanggang Php8,000 bago sila binigyan ng OEC sa POEA sa kanilang lugar.

Dati, ang mga OFW lang na paalis sa Pilipinas sa unang pagkakataon ang sinisingil nito, pero alinsunod sa direktiba ng Department of Labor and Employment na ipinatupad ngayong Marso ng kasalukuyang taon, pati ang mga dati nang OFW ay kailangan nang magbayad para dito.

Kapag pinagsama-sama ang mga bayarin na ayon sa mga batas o direktiba na inaprubahan na pero hindi pa lahat pinatutupad, aabot sa hindi kukulangin sa Php5,000 bawat buwan ang kanilang dapat ipaluwal mula sa kanilang sahod, o Php60,000 sa isang taon.

Hindi kataka-taka na karamihan sa mga OFW ay umaalma ngayon, hindi lang dahil sa biglang pagtaas ng mga bilihin, kundi dahil din sa pakiramdam nila ay naging gatasan na sila ng pamahalaan sa Pilipinas.

SUSUNOD: Ilegal ba ang expanded mandatory insurance?