.gif)
Alas dyes na ng gabi at handa ng matulog si Rowena nang
marinig ang katok sa pinto at tawag ng among babae. Nagtataka man ay agad niyang
pinagbuksan ito at tinanong kung may kailangan.
Humingi naman ito ng paumanhin
bago sinabi ang, “Rowena, I'm so sorry but can you please come with me? Sir got
an accident.” Gulat na tinanong niya ang amo kung ano ang nangyari pero sinabi
lang nito na magbihis na siya agad para masamahan siya sa paglabas.
Pupunta
pala ito sa Hong Kong University para puntahan ang asawa na naaksidente daw sa
may hagdanan doon at hindi makalakad. Halos maputol ang hininga ni Rowena sa
paghabol sa amo na mabilis na lumalakad.
Pagdating sa unibersidad ay nakita
nila ang among lalaki na nakasalampak sa may hagdanan at namamaga ang bukong-bukong.
Hindi na ito makatayo sa sobrang sakit, at pati ang mga gamit ay nagkalat sa
paligid. Pababa daw ito sa hagdanan, at dahil sa sobrang dilim ay nagkamali sa
pag-apak. Akala daw nito ay nasa ibaba na siya ngunit may isang hakbang pa
palang natitira sa hagdanan kaya ito natapilok.
Kinailangan nilang alalayan ito
sa magkabilang braso para maisakay sa taksi at maiuwi sa bahay.
Habang
naglalakad ay panay sabi daw ng amo sa kanya mag-iingat at huwag gagamit ng cellphone
kung naglalakad, lalo na kung bumababa sa hagdanan. Panay “yes ma’am” at “yes,
sir” na lang daw ang isinagot niya.
Dahil sa nangyari ay isang linggong
nakabenda ang paa ng kanyang among lalaki at hindi makapasok sa trabaho. Mabuti
na lang at ang asawa nito ang matiyagang nag-alaga dahil bugnutin ang among
lalaki, na kapag hindi naintindihan agad ang utos ay agad nagkukunot-noo.
Ang
maganda lang, dahil sa aksidente ay lagi na nitong sinasabi kay Rowena ang “You
take care” tuwing lumalabas siya ng bahay.
Sa isip ni Rowena, sa loob ng
dalawang taon at anim na buwan niyang paninilbihan sa mga ito ay ni minsan ay
hindi siya kinumusta o tinanong tungkol sa kanyang pamilya. Kung di pa
naaksidente ay hindi ito magpapakita ng pag-aalala sa kanya. Si Rowena ay 33
taong gulang, dalaga at taga Iloilo. Naninilbihan siya sa mag-asawang Intsik na
taga Pokfulam at may dalawang anak. – Ellen Asis
