Ganap nang medical technologist at computer engineer
ang dalawang anak ni ate Lenny nang kusang bumalik sa kanilang pamilya ang
asawa niya na baldado na noon. Malugod naman siyang tinanggap ng kanilang
dalawang mababait na anak kaya hindi na
nakaimik si ate Lenny.
Iniwan sila ng kanyang asawa nang maliliit pa ang
kanilang mga anak, matapos umalis papuntang Hong Kong si ate Lenny. Binalikat
niya mag-isa ang pagpapaaral sa kanyang mga anak, na mabuti na lang ay parehong
mabait at matalino.
Naging malas man daw si ate sa kanyang asawa ay naging
mapalad naman siya ang mga amo dahil sobrang bait nila sa kanya. Mataas ang
sahod na binigay sa kanya at trinato siya na kapamilya.
Inako din ng mga amo
ang pagpasyal-pasyal ng kanyang mga anak sa Hong Kong, at tuwing nagkakaroon
siya ng problemang pinansyal ay buong puso siyang tinutulungan at
sinusuportahan ng mga ito. Masipag daw kasi sa trabaho si ate at
mapagkakatiwalaan sa lahat ng bagay, lalo na sa pag-aalaga niya sa kanilang
nag-iisang anak, kaya ganoon siya
kamahal ng mga amo.
Hindi din maselan ang mga ito dahil natuwa pa daw sila sa
kanya nang husto nang malaman na kumakain ang kanilang anak ng mga pagkaing
Pinoy gaya ng binagoongang baboy, adobo, pinakbet at sinigang. Hanggang ngayon
ay mahilig pa din daw sa mga ganitong pagkain ang kanyang alaga na bagamat nag-aaral
na sa Europa ay nagpapaluto pa rin sa kanya ng mga ito tuwing umuuwi sa Hong
Kong.
Kamakailan ay dumating ang isa pang biyaya kay ate dahil ang bunso niya
ang napili ng kumpanyang pinagtatrabahuan na ipadala sa New Zealand. Biro daw
ni bunso sa kanya, baka pagdating ng araw ay pwede na siyang mag-petisyon para
doon na lahat silang lahat tumira.
Napapaluha si ate habang nakikipagkwentuhan sa
mga kaibigan kamakailan tungkol sa mga biyayang ipanagkaloob sa kanya ng
Panginoon, lalo na sa pagkakaroon ng mababait at responsableng mga anak.
Nagpapasalamat siya dahil hindi daw siya pinabayaan ng Diyos sa mga panahong
hirap na hirap siya.
Si ate Lenny ay tubong Nueva Ecija, 55 taong gulang at
kasalukuyan pa ring naninilbihan sa mga mababait niyang employer na Intsik na
taga Shatin. – Marites Palma
