 |
| Mahigit 600 na OFW ang tumulong para maitala ang bagong rekord sa marathon CPR |
Ni George Manalansan
Kabilang ang humigit-kumulang 600 Pilipinong manggagawa sa
mga tumulong para makapagtala ng pinakamaraming bilang ng nagsanay ng
cardio-pulmonary resuscitation (CPR) sa tuloy-tuloy na sesyon noong Peb. 3-4 sa
Fire and Ambulance Services Academy sa Tseung Kwan-O.
Ang kabuuang bilang na 3,027 ay pumasok sa Guinness World
Records para sa kategorya ng paramihan sa pagsasagawa ng tuloy-tuloy na CPR.
Ang dating record na 2,619 ay naitala ng India noong 2016.
Bilang paghahanda, ang mga migranteng Pilipino ay binigyan
ng pagsasanay sa compression only cardio pulmonary resuscitation (COCPR, isang
mas simpleng paraan ng CPR) noong Enero 7, 14 at 28 sa HK University sa
Pokfulam.
Sinamahan nila sa CPR Marathon 2018 ang mahigit 2,500 katao,
na binubuo ng mga guro at estudyante sa ilang paaralan sa Hong Kong.
 |
| Kabilang sa mga nag-organisa si Dr. Mike Manio ng HKU |
Bukod sa pagsali para makapagtala ng bagong record, layunin
din ng mga nagbigay ng pagsasanay na maparami ang bilang ng mga tao sa Hong
Kong na maaring makapagbigay ng first aid at mapataas ang tsansang mabuhay ng
mga biglang kinakapos ng hininga o nawawalan ng malay.
Sa araw ng marathon, may libreng sakay sa mga kasali mula sa
Tiu Keng Leng MTR. Pagdating sa lugar na pagdarauan ay isa-isang nirehistro ang
mga kasali at binigyan ng numero at pulseras na may barcode. Nagkaroon muli ng
pagsasanay bago sumabak sa marathon. Sa dami ng mga kalahok ay kinailangang umupo
muna at maghintay.
Sa tulong ng mga ambulance men at CPR marathon helper ay
naging maayos ang daloy ng pila para sa panghuling hakbang na isinagawa sa loob
ng auditorium.
Isa si Jim Cheung sa mga CPR helper na nagpalakas ng loob sa
mga kasali, at nagsabing gamitin lang nila ang natutunan sa mga pagsasanay at
sa praktis para makaraos.
“Have your power to push, compress continuously without a gap,”
ang bilin niya. “Remove your watch, necklace, jackets or anything that may
obstruct you, If you stop for 5 seconds you failed….the next trainee will come
in and prepare to change after the count,
5, 4, 3, 2, 1. If you pass, you will become a certified CPR first
aider.”
Isa sa mga kalahok si Jennete Ladiero, na halatang
malungkot. Naalala kasi niya nang minsang magbakasyon siya ay biglang tumumba
sa harap niya mismo ang ama, at namatay. Wala daw siyang
nagawa dahil wala pa siyang alam sa paglalapat ng first aid. “Siguro kung may
alam na ako noon, baka buhay pa siya ngayon,” ang sabi niyang may panghihinayang.
Bago lumabas ng auditorium ang mga kasali ay binigya sila
isa-isa ng tiket para sa museo ng mga bumbero na nasa parehong gusali. Dito ay
makikita ang mga lumang gamit sa pag-apula ng apoy, isang talaan ng mga sunog sa
loob ng nakaraang tatlong dekada, mga first aid kid, at ang nilalaman ng isang
ambulansiya.
