Nakawan sa volleyball court

Ni Marites Palma

Tinangay ng magnanakaw ang bag ni K C Tambo na may lamang $10,000 cash noong June 11 sa kasagsagan ng kanilang paglalaro ng volleyball sa Fu Hai Park Volleyball Court, Quarry Bay.

 Sa tulong ng mga pulis ay natagpuan ang bag ni Tambo na ninakaw, ngunit wala na ang perang laman nito.

Pinag-iingat ng pulis ang lahat ng mga manlalaro na bantayan ang kanilang mga gamit sa court, lalo na iyong may mahahalagang laman dahil pang-apat na diumano ang nakawang naganap sa parehong lugar.

Kahit kasi may mga nakatalagang magbantay ng mga gamit ay naiisahan pa rin sila dahil masyado diumanong mabibilis ang kamay ng mga magnanakaw doon.

Ayon sa organizer ng mga palaro, lagi naman nilang pinaaalahanan ang mga manlalaro na huwag na huwag magdadala ng malaking halaga ng pera o mga mamahaling gamit, pero patuloy pa rin silang sinusuway.  Ayon naman sa isang manlalaro, parang ninja sa bilis ang magnanakaw.

Maari din daw na kasamahan nila ang nagnanakaw dahil madalas na sila-sila lang din ang magkakasama, bagamat wala naman daw silang suspect pa sa ngayon.